好多父母會反映，喺BB 1歲以前嘅嬰兒時期當中，覺得最艱難嘅時期莫過於係照顧初生BB，以下呢10件事都係最考驗爸爸媽媽嘅能耐。
1. BB成日喊
細嘅BB經常會因唔同原因而日喊夜喊，如： 肚餓、濕片、冇安全感、抱得唔舒服、太凍太熱等⋯⋯而喊嘅頻率亦非常高，有時爸爸媽媽做晒所有嘢都無法安撫BB停止哭喊，令媽媽感到無力又氣餒。
2.BB唔瞓覺
當媽媽忙足一日感到非常疲累，最後只剩下氹BB瞓覺嘅任務，但偏偏BB點都唔肯瞓，或本來明明瞓著咗，忽然又會扎醒咗喊。
3. BB唔飲奶
有啲BB會出現厭奶時期，忽然有一排好抗拒飲奶，一見奶樽就出手推開，但媽媽又怕BB會體重下跌而用盡千方百計氹BB飲奶，令媽媽精神承受極大壓力。
4. BB病
有咩慘得過BB病咗但又溝通唔到？餵BB食藥、吸鼻水出嚟嘅舉動簡止係難過登天！BB一方面因病而難受，另一方面唔鍾意父母餵藥同吸鼻而掙扎大喊，爸爸媽媽看在眼內，亦會同樣感到痛苦！
5. BB唔屙屎
BB嘅便便係反映健康嘅重要指標，當BB幾日都唔大便，媽媽就會非常緊張同焦慮，完全係精神上嘅折磨！
6. 媽媽唔夠瞓
每日都身心疲累到一個點，但長期都無足夠嘅休息時間，令媽媽無時無刻都感到好眼瞓，抵拒力亦會變差，令媽媽身體變得愈嚟愈弱。
7. 餵母乳困難重重
一日要埋身餵／泵幾次奶，有時為確保奶量充足，連半夜都要起身泵奶，仲要忍受BB吸損乳頭、冇及時排清奶而變石頭胸、因塞奶而胸刺痛同發燒等，餵母乳嘅辛酸真係母乳媽媽先會明。
8. 冇晒個人娛樂
由BB出世起，媽媽日忙夜忙到連瞓覺時間都冇，更加唔好提去睇本書、睇場戲、打下機等個人娛樂，生活就好似只剩下湊BB。
9. 同屋企人湊BB嘅意見不合
湊BB嘅方式，每個人都會有唔同意見，有時媽媽嘅湊B方式都會被人質疑或干涉，令媽媽非常憤怒。
10.夫妻缺少交流
所有時間同重心都放晒喺BB身上，自然同另一半嘅交流減少，冇時間關心對方之餘，有時更會因對方嘅豬隊友行為產生不滿同磨擦，令媽媽覺得自己係孤身作戰。
Commenti