「爸爸，細佬打我啊！」
「佢唔畀我玩玩具！」
「家姐，講大話！」
係咪日日都聽到以上對白呢？
經常聽人講「你係家姐，應該讓細佬」，「家姐讓細佬」係天經地義，但事實真係如此，大一定要讓細？
傳統觀念「大讓細」，因為大嘅就成熟一點，細嘅未懂事。有部份父母認真處理，希望「兄弟鬩牆」事件釐清，但係大嘅有大嘅道理，細嘅亦有道理，大家都有道理，結果好有可能「誤判」。被冤枉嘅一方覺得爸媽偏心，今次僥倖過骨嘅一方覺得呃得到一次，下次故施重技。又或者父母一句「大家算啦，大家錫返啦」。看似平熄事件，但原來大家內心依然不滿，結果係蘊釀緊下一輪嘅「大戰」。
咁大人應該點處理手足間呢種爭執？試下「把孩子的事留給孩子」。美國有學校研究指小孩兩歲開始，就已有基本的辯論能力，將孩子嘅事留俾佢哋處理，除咗可以令佢哋親自解決雙方問題、修好關係，更可以訓練出孩子嘅說話技巧、表逹能力。方法係：
每個人輪流講自己嘅睇法，呢個階段除咗說話嘅人可以發表想法，其他人只能聽，不能開口。
說話時，要將自己嘅感覺說出來。
雙方開始協商。
協商唔單只係解決當天嘅爭執，仲要商量以後遇到類似情況嘅解決之道。
不准讓任何一方，要「無大無細」，無分大與小。
爭吵完後，雙方向父母會報結果。
孩子學到：表達情緒、同理心、解決問題、道歉、接受道歉及溝通協商。解決紛爭過程中，最重要係傾聽他人及表達自己嘅情緒，咁先唔會淪為無意義嘅攻防戰；每個人嘅意見、個性都不同，反覆練習，讓孩子去親自處理人際關係問題，學習人與人嘅相處之道。