相信呢句說話都不時係聽到身邊嘅親朋戚友問過，甚至係自己心底閃現過好幾個不眠嘅晚上。近呢幾年因為香港局勢及疫情，令到唔少人萌生離開香港嘅念頭，加拿大新簽證計劃推出3個月就已經收到港人近6000份申請。
移民不移民？你心入面又有冇答案呢？一齊嚟睇睇討論區嘅網民對移民有咩睇法啦！
媽媽A：「緊係走啦！仲留係香港做咩？你睇下，香港冇將來架啦！物價又高，樓價又貴，我老公打份工朝9晚6呀，都養唔起頭家！我又要湊住班細路，想去番工幫輕下都唔得！再加上疫情關係，老公份糧要打折出，襯宜家移民門檻放闊咗，緊係早走早著啦！」
媽媽B：「移民喎，你估去個staycation咁簡單呀？我屋企仲有兩個老人家，其中一個仲要有長期病，要keep住番醫院覆診架，去到外國佢地又唔識講英文，點生活呀？如果自己一家人走，阿女一定喊死，佢由細到大都係婆婆湊，痴佢仲多過痴我，移民真係唔好話講呀，我諗都唔敢諗呀！」
爸爸A：「唉！有能力邊個唔想走呀，我都明對仔女留係香港將來大把問題，但我自己學歷又唔高，過到去揾到咩做呀？宜家係香港死慳死底都叫做生活到，一下子咁多人移民過去喎，我邊夠人爭，我肯洗碗呀，人地都未必請我啦！」
媽媽C：「人人都話放唔低香港，但你地有冇諗過遲多兩年，你地想走都未必走到啦！唔識英文咪去學囉，同埋宜家科技咁發達，到時Zoom都見到面啦，唔好俾咁多藉口自己，跳出個comfort zone啦！船到橋頭自然正，邊會餓死人吖！」
爸爸B：「嗱，我就好現實嘅，咁多人移民，間間神校都話流失率高，要登報紙撜插班生，我個仔當年waiting入唔到，宜家咁大個機會係面前，我係唔會走架！入到間好學校，怕咩第時入唔到大學，搵唔到份高薪厚職呀！」
爸爸C：「為咗對仔女，真係賭一鋪都要，而我就贏咗啦！我地搬咗去澳洲就快半年啦，以前屋企細，小朋友想活動下都冇位，宜家用香港一半價錢就租到間屋，個廳放埋滑梯都仲得呀，呢度周圍都係公園，休嬉空間好足夠。再加上學校唔催谷，以前逼佢地做功課搞到家嘈屋閉，宜家收工番到嚟佢地已經晨早做完功課，一家人食完晚餐，大把family time，親子關係都好咗呀！」
睇完以上6位爸爸媽媽分享，唔知大家對移民有咩睇法呢？
Commentaires