BB一歲生日過後，孩子已踏人幼兒期。隨着BB開始識行路同埋講野，佢會變得獨立。呢個階段嘅孩子會測試自己嘅自主能力，佢會用各種方式去試探家長嘅底線，突登同你作對，令你生氣。除此之外，1至2歲已經可以有以下各方面嘅能力，家長不妨留意下。
活動：
1. 到歲半左右，孩子通常已經會四處走動，但步伐可能仍然不穩。
2. 到咗2歲就能夠平穩咁行走。
3. 除咗快步行外，仲開始識得跑。
4. 會蹲下來執起地下嘅物件而唔會跌倒。
5. 拎住或拖拉住玩具行路。
6. 可以自行攀爬上落傢俱（如梳化、矮床等）。
7. 會扶住欄杆上落樓梯。
8. 會嘗試踢球。
手部運用：
1. 會將4塊或更多嘅積木／小盒子疊成小塔。
2. 可翻書，但未能每次翻一頁。
3. 會扭動門嘅把手同埋扭開瓶蓋。
4. 能將小柱子塞進孔內。
5. 會用顏色筆塗鴉。
6. 開始慣性用左或右手。
語言能力：
1. 能辨別多個熟悉人物嘅名、物品嘅名稱。
2. 能辨別多個不同嘅身體部位。
3. 唔需要動作提示都能跟從簡短嘅指示，例如：「將個波交畀我」。
4. 會講單字，通常係先學識講名詞，然後再學講動詞。
5. 開始將單詞组合起嚟，例如「去-街街」，「食-餅」，「食-飽」。
認知發展：
1. 開始將物件按形狀及大小分類。
2. 愛上玩假想遊戲，例如「煮飯仔」。起初只會以自己為對象（如拎起玩具碗及匙羹餵自己食飯，拎起玩具梳幫自己梳頭等），後來會擴展到以其他人或洋娃娃做對象（如餵洋娃娃食飯，幫媽媽梳頭等）。
3. 開始從嘗試及錯誤中，學習解決問題。
社交和情緒發展：
1. 通常會比較以自我為中心。
2. 鍾意望住其他孩子（通常係比自己年紀大）玩，亦鍾意同佢哋一齊。
3. 佔有慾強，會同其他小朋友爭玩具。
4. 會用動作（如用手指指住）或說話表達自己嘅需要，有時更會引領你去注意佢感興趣嘅事或物件。
5. 接近2歲開始同其他小朋友有互動嘅遊戲。
6. 會模仿成人及較年長小朋友嘅行為。
自理能力：
1. 會嘗試自己用匙羹進食及用杯子喝水。
2. 識得自己除鞋。
3. 識得表達自己需要去廁所。